Mən, Lyudmila Ağamalı qızı İbrahimova, 15 iyun 1947-ci ildə Bakı şəhərində, ziyalı bir ailədə dünyaya gəlmişəm. Müharibədən sonrakı illərdə bacım və qardaşımla birlikdə böyümüş, uşaqlıqdan elmə və mənəviyyata dərin maraq duymuşam. Orta məktəbi bitirdikdən sonra Azərbaycan Dövlət Universitetinin Filologiya fakültəsinə daxil olmuşam. 1969-cu ildə hərbçi ilə ailə həyatı qurmuşam və həyat yoldaşımla birlikdə uzun illər ərzində Ukrayna, Sankt-Peterburq, Dağıstan, Almaniya və Belarusiyada yaşamışıq. Bu illər ərzində ailəmizdə dörd övlad dünyaya gəlib.

1994-cü ildə Minsk şəhərində yaşadığımız dövrdə böyük qızımla birlikdə sürücülük kurslarına yazıldıq. Orada bizə İsa Məsihə iman edən bir qadın Müjdəni çatdırdı. Onun dəvəti ilə “Yeni Həyat” Kilsəsinə getdik və həmin vaxt mən ruhən yenidən doğuldum - Müqəddəs Ruh və su vəftizi aldım. Bakıya qayıtdıqdan sonra qəlbimdə dərin bir inam formalaşdı: Tanrı Azərbaycanda Öz Kilsəsini qurmaq istəyir. Artıq 25 ildir ki, Bakıda “Yeni Həyat” Xristian İncil Dini İcmasının pastoruyam. Xidmətimin əsas məqsədi - millətimizin mənəvi dəyərlərlə zənginləşməsinə töhfə vermək, insanlara Yaradanını daha yaxından tanımağa kömək etmək və dünyanı bir qədər daha yaxşı yerə çevirməkdir.

Həyatımın ən böyük sevinc və neməti isə bütün yaxınlarımın İsa Məsihi şəxsi Rəbb və Xilaskarı kimi qəbul etməsidir. Atam 86 yaşında imanlı bir insan olaraq bu dünyadan köçdü. Ruhani yolumda mənim üçün böyük örnək və müəllim Belarusiyada “Yeni Həyat” Kilsəsinin Yepiskopu Vyaçeslav Leonidoviç Qonçarenko olub. 

Məsihdə sevgi ilə,

Lyudmila İbrahimova